Ginkumpirma ni Senate President Juan Miguel Zubiri nga si Senator Robin Padilla ang nagapanguna sa pagpaninguha nga makuha ang suporta sang iban nga myembro sang Senate committee on women, children, family relations and gender equality agud pamatukan ang pag-isyu sang warrant of arrest batok kay Kingdom of Jesus Christ leader Apollo Quiboloy.
Matandaan si Senator Francis Tolentino ang una nagbuyagyag nga may yara sang nagaduso nga baliskaron ang desisyon sang panel chairperson nga si Senator Risa Hontiveros nga ipaaresto ang pastor.
Suno kay Tolentino, may “grupo” nga nagapangtipon sang pirma agud nga mapunggan ang ipaguwa nga warrant of arrest.
Sa kumpirmasyon naman ni Zubiri, nakasaad nga ginatinguhaan ni Padilla nga makakuha sang majority sa committee members agud nga balion ang desisyon sang chairperson. Pahayag ni Zubiri, nagsiling pa si Padilla nga may isa ka semana lang siya agud nga mangtipon sang pirma.
“So let’s respect that,” pahayag sang senate president.
Bangud si Zubiri ang senate president kag siya man gihapon ang magapirma sa order, ginsiling sini nga hulaton niya anay nga ma-settle sang Senate committee ang amo nga isyu antes siya magpaguwa sang iya komento kaangot sa posible pag-isyu sang warrant batok kay Quiboloy.
Sa separado nga pahayag, ginkumpirma sang presidential sister nga si Senator Imee Marcos nga may amo nga mga tikang si Padilla — kag lakip siya sa magapirma.
“Kami ni Senator Robin, talagang pipirma, nagkasundo kami kagabi na pipirma kami para ipaatras itong contempt order kasi parang ‘di naman s’ya tama,” suno kay Marcos,
Posible man suno sa iya nga makuha man nila ang suporta nanday Senator Bong Go kag Senator Cynthia Villar.
Nahibaluan nga magluwas kanday Hontiveros, Marcos kag Padilla, lakip sa myembro sang senate panel amo sanday Senators Nancy Binay, Pia Cayetano, Cynthia Villar, Grace Poe, Raffy Tulfo, Bong Go, JV Ejercito, kag Mark Villar.
Ang mga ex-officio members naman amo sanday Senate President Pro Tempore Loren Legarda kag Majority Leader Joel Villanueva, kag Minority Leader Aquilino “Koko” Pimentel III.
Martes sang ginpa-cite in contempt ni Hontiveros si Quboloy bangud sa indi pag-sipot sa Senate investigation sa gina-alegar sexual abuses kag human trafficking nga iya nahimo apisar pa nga may subpoena nga ginpaguwa.#
