Padayon nga gina-monitor sang Philippine Atmospheric, Geophysical and Astronomical Services Administration (PAGASA) ang isa ka low pressure area nga yara subong sa gwa sang Philippine Area of Responsibility (PAR).
Sa 2:00 a.m. monitoring sang weather bureau, nakit-an ang LPA sa kalayuon nga 1,535 nasidlangan sang Northeastern Mindanao.
Suno sa weather bureau, may medium chance ini nga mangin bagyo sa masunod nga 24 oras.
Tawgon ini nga Bagyo Jose kun mag-develop na sa tropical cyclone kag kun yara na sa PAR. Manubo ang tyansa sang pag-landfall suno pa sa ahensya.
Ginaabisuhan man ang publiko nga magpabilin nga aligmat sa pag-ulan-ulan nga ginadala gihapon sang Habagat sa pungsod.
Subong nga Lunes, gina-forecast nga mangin magal-umon sa Visayas nga may lapta-lapta nga pag-ulan kag pagpangilat bangud sang localized thunderstorm.
Nahibaluan nga base sa National Disaster Risk Reduction and Management Council (NDRRMC), 18 na ang naisip nga patay, pito ang napilasan, kag 12 ang missing bangud sang pagbaha kag landslide nga dala sang Habagat kag sang naglabay si Bagyo Inday sa pungsod. Sa mga napatay, 10 ang na-rekord sa Malapatan, Sarangani; anum sa Calanogas, Lanao del Sur; kag duha sa Bukidnon.
.){kind=link}