Apisar naagyan ang kabudlay kag kasubo sa sulod sang jail facility, wala ini nagpugong sa isa ka anay Person Deprived of Liberty (PDL) nga mangin produktibo kag mapuslanon sa gihapon kag pamatud-an ang pagbag-o sa kabuhi.
Ini ang ginpakigbahin ni Paul, isa ka Person Restored of Liberty (PRL), kadungan sang obserbasyon sang National Correctional Consciousness Week kag subong nga Prison Awareness Sunday, Oktubre 25.
Sa Good Morning Philippines sa Bombo Radyo Iloilo, ginpahayag sini nga sang yara siya sa sulod sang jail facility, nagpasakop siya sa mga programa sang Bureau of Jail Management and Penology (BJMP) Western Visayas nga nakabulig man sa iban nga indibidwal sa sulod sang pasilidad.
Nangin facilitator siya sang Therapeutic Community Modality Program (TRMP) nga amo ang self-help kag social learning treatment model nga gindesinyo para sa rehabilitasyon sang mga PDL agud nga mapreparar sila sa societal reintegration ukon pagbalik liwat sa sosyudad.
Pahayag ni Paul, daku man ang ila pasalamat sa Simbahan, sa iban pa nga ahensya sang gobyerno, amo man sa pribado kag non-government agencies nga nagdala sang nanuhay-tuhay nga programa nga nakabulig sa ila sa madamo nga aspeto kaangay sa mental kag espiritwal.
Ginpakigbahin man sini nga sang nakaguwa na siya sa pasilidad, na-eksperyensyahan man sini ang stigma ukon ang lain nga panan-aw sa iya, apang wala siya nagpalingkang kag ginhimo niya ini nga inspirasyon agud nga pamatud-an nga nagbag-o na ini.
“May na-eksperyensya ako nga discrimination. Bale wala ko na siya gin-take as negative. Ginhimo ko na siya nga inspirasyon nga mangin patuloy pa gid sa akon nga pangabuhi. I walk my talk. Ginpakita ko sa ila ang akon nga pagbag-o, in a way nga makita nila nga nagbag-o na gid man ako,” suno kay Paul.
Gin-endorso man sang Bureau of Jail Management and Penology (BJMP) Region VI si Paul sa Integrated Livelihood Program ukon Kabuhayan Program nga flagship grant program sang Department of Labor and Employment (DOLE) nga amo ang nakabulig sa iya sa negosyo.
“Sa mga kapwa ko PRL, ang pinaka-naghatag sa akon sang lesson nga dapat i-accept naton nga nakasala kita kag indi kita magpa-apekto sa mga negatibo. Dapat gid nga mangin produktibo kita,” dugang sini.
Ginpahangop man sini kun ano ka-importante ang pagdangop sa Diyos.
“Magpangayo kita sang kabakod sa aton Mahal nga Ginuo nga maghatag sa aton sang gabay, kag maghatag sa aton sang direksyon kag masanag nga bwasdamlag,” dugang sini.
Ini nga interview ang gin-conduct nga may yara sang nagakaigo nga permiso halin sa natungdan kag gin-updan sang Parole and Probation Administration (PPA) Region VI, BJMP Region VI, kag Jaro Archdiocesan Commission on Prison Pastoral Care.
SECOND CHANCE SA KABUHI
Nagpanawagan naman si Jaro Archdiocesan Commission on Prison Pastoral Care Director Reverend Father Ildefonso Cachuela, Jr. sa publiko nga mangin ma-abi-abihon kag hatagan sang “second chance” ang mga tawo nga nakagwa na sa jail facility.
“We really invite you to be active partners, active nga myembro sang Simbahan, nga nagahatag sang second chance para sa aton nga mga utod nga nakaagi sa correctional facility. May we become more welcoming, more compassionate, and magahatag kita sang oportunidad sa ila nga ma-prove nila nga nagbag-o na gid man sila sa ila nga kaugalingon,” suno kay Father Cachuela.
Dugang sini: “Kabay pa nga mangin matuod gid kita nga Kristiyano Katoliko nga nakahibalo maglantaw sa tawo — regardless kun ano man ang iya nga mga naagyan in the past, nagatulok kita sa iya nga siya gintuga sang Ginuo sa Iya nawong kag kapareho.”
Ang Prison Awareness Sunday amo ang tuigan nga obserbasyon sang Simbahan nga ginadedikar sa pagpangamuyo kag pagpalapnag sang impormasyon natuhoy sa kabuhi sang Persons Deprived of Liberty (PDLs).
Gin-establisar ini sang Catholic Bishops’ Conference of the Philippines (CBCP) sang 1987 paagi sa Episcopal Commission on Prisoners’ Welfare nga amo na subong ang Episcopal Commission on Prison Pastoral Care.#
