ILOILO CITY – Gin-athag sang Department of Labor and Employment nga wala sang advisory nga ipauntat ang DOLE-AKAP for OFWs bangud sa ginapahayag kakulangan sa pondo.
Sa interview sang Bombo Radyo kay Niezel Sabrido, tagpamaba sang Department of Labor and Employment 6, iya ginpahayag nga sa subong, padayon pa ang pagbaton sang electronic applications kag evaluation agud nga matumod ang mga makabaton sang financial assistance.
Suno kay Sabrido, indi tanan nga nag-apply ang makabaton sang cash assistance bangud nga limitado lamang ang pondo sang ahensya.
Sa bahin naman sang COVID-19 Adjustment Measures Program (CAMP), indi na mahimo nga makapasa sang application bangud nga limitado man ang pondo.
Para sa mga wala pa nakapasa sang application ukon wala nalakip sa initial kag final list, mahimo nga maka-apply sa Department of Finance agud nga makabaton sang ayuda.
