Nagpaguwa na sang statement ang Department of Justice (DOJ) kasunod sang pagbawi sang prosecution star witness kag anay officer in charge sang Bureau of Corrections (BuCor) nga si Rafael Ragos sa mga testimoniya batok kay Senator Leila de Lima.
Suno sa DOJ, ang mga ginpanghambal ni Ragos ang indi makaguba sa pwersa sang ebidensya nga gina-uyatan sang gobyerno.
Ginpahayag man sini nga bastante ang mga testimoniya sang mga testigo nga ginpresentar sang prosecution agud nga mapamatud-an ang drug charges batok kay De Lima kag kay Ronnie Dayan.
Duda man ang DOJ sa motibo ni Ragos kun ngaa ginbawi sini ang testimoniya batok kay De Lima kag kun ngaa naglawig pa sang lima ka tuig ang iya ginhulat antes lainon ang iya nga statement.
Bangud higly-suspicious kag kwestyonable para sa DOJ ang nangin statement ni Ragos, depende na sa korte suno sa ahensya kun ikonsiderar ang affidavit of recantation ni Ragos kag kun sarang sini mabawi kag maguba ang iya una nga affidavits kag testimonies.
Si Ragos amo ang ikalima nga witness sang prosecution sa ikaduha nga kaso batok kay De Lima sa Muntinlupa Regional Trial Court Branch 204, apang indi siya witness sa ikatatlo nga kaso sa Muntinlupa RTC Branch 256.
Matandaan nga pila sa gin-ako ni Ragos sa iya affidavit sang April 30, 2022 amo nga si former DOJ chief Vitaliano Aguirre II ang nagpahog sa iya kag nagpwersa agud nga patu-patuan sang istorya si De Lima.
Wala pa sang gin-isyu nga sabat si Aguirre tuhoy diri.
Antes ang pagbawi ni Ragos sang iya nga statement, nauna na si self-confessed drug dealer Kerwin Espinosa nga nagbawi man sang iya nga testimoniya batok kay De Lima.
Sa separado nga statement, ginpahayag naman ni Justice Secretary Menardo Guevarra nga ipasa ang affidavit ni Rafael Ragos sa Office of the Ombudsman para sa appropriate action. ##
