ILOILO – Wala sang legal nga basehan ang Philippine National Police sa pagpatuman sang total ban sa paggamit sang vape sa pungsod.
Ini ang kasunod sang pahayag sang Philippine National Police nga ila ipatuman ang Executive Order 26 nga ginpirmahan ni Presidente Rodrigo Duterte.
Sa interview sang Bombo Radyo kay Atty. Leo Superio sang Integrated Bar of the Philippines, iya ginpahayag nga sa subong, wala sang layi nga nagadeklarar nga ginadumili-an ang paggamit sang vape.
Suno kay Superio, ang Kongreso lamang ang may yara sang police power ukon gahum nga makapasar sang layi kag indi ang presidente nga limitado lamang sa executive order.
Ginpahayag ni Superio nga ang Executive Order 26 nga una nga ginpirmahan ni Presidente Rodrigo Duterte ang applicable lamang sa tanan nga government agency sa idalom sang executive branch.
Ang nasambit nga executive order ang kasubong lamang sang office regulation nga nagaserbe nga pahanumdum kag wala sang penalty nga ipatuman.
Mas makapaayo suno sa natungdan nga magpasar anay sang layi ang Kongreso antes ipatuman sang Philippine National Police ang nasambit nga mandu.
