ILOILO – Iduso sang Provincial Disaster Risk Reduction and Management Council sa Sanguniang Panlalawigan nga ipaidalom sa state of calamity ang pila ka mga banwa sa probinsya sang Iloilo.
Ini ang may kaangtanan sa paglaslas sang Bagyo Ursula sa diin 16 ang patay kag isa ang missing sa probinsya sang Iloilo.
Sa interview sang Bombo Radyo kay Iloilo Gov. Arthur Defensor Jr., iya ginpahayag nga sapulon pa niya ang mga nagabug-os sang Provincial Disaster Risk Reduction and Management Council agud tun-an kun bala magapatigayon sang special session agud nga matigayon ang pagduso sang resolusyon.
Suno kay Defensor, padayon pa ang pagtipon sang data agud nga mahibalu-an ang kabug-usan nga halit nga gintuga sang bagyo.
Ginpahayag ni Defensor nga santo sa partial and official data, 237 ka barangay ang apektado gikan sa banwa sang Ajuy, Batad, Balasan, Carles, Concepcion, Estancia, San Dioniso, Sara, Passi City kag Bingawan.
Nagalab-ot sa 35,000 ka pamilya ang apektado kag nagalab-ot sa 5,921 ka balay ang naguba kag sa subong, ginahulat na lang ang P10 million nga bulig halin sa Office of the President.
Samtang, gin-ako ni Defensor nga may kakulangan sa rescue operation sa tagsa ka Municipal Risk Reduction and Management Council.
Suno sa gobernador, organisado ang Provincial Disaster Risk Reduction and Management Office sa tion nga naglaslas ang Bagyo Ursula apang mabudlay ang maintenance sa pagsweldo sa mga personnel bangud nga malaka lang ang kalamidad.
Ginpahayag sang natungdan nga sa tion sang relief operations, naga-isa man ang mga ahensya sang gobyerno agud nga maghatag sang bulig sa mga biktima sang kalamidad.
Ginapa-review na sang gobernador ang tuhoy sa hazard map sa probinsya sang Iloilo.
Suno kay Defensor, nagakinahanglan na nga ilisan ang hazard mapping bangud nga may mga lugar sang una nga wala ginabaha apang sa subong, ginabaha sa tion nga mag-ulan.
Isa sa ginalantaw nga rason amo ang pagpang-utod sang kahoy kag sa baylo, ginahimo nga kamaisan ang mga bukid.
