“May you continue to dream boldly, serve with purpose, and lead with compassion.”
Ini ang mensahe nga ginbilin sang beauty queen-actress nga si Rabiya Mateo para sa Class of 2026 sang Iloilo Doctors’ College (IDC).
Si Rabiya ang nangin guest speaker sa 51st Commencement Exercises sang amo nga eskwelahan nga ginhiwat sa Iloilo Convention Center (ICC) kahapon, Mayo 29.
“Education is the greatest social equalizer. Knowledge is, and always will be power. Had a full-circle moment as I returned to my beloved alma mater, Iloilo Doctors’ College, this time as a guest speaker. Truly honored to celebrate this milestone with the graduates,” post ni Rabiya matapos ang event.
Suno sa IDC Gazette Official, ang official student publication sang IDC, 1,168 graduates sa Academic Year 2025-2026 ang nagbaton sang ila diplomas sa amo nga seremonya.
Matandaan nga walo ka tuig na ang nagligad, nag-gradwar si Rabiya bilang cum laude sa IDC nga may degree sa physical therapy.
Ginkoronahan man siya nga Miss Iloilo tubtub nga nangin Miss Universe Philippines 2020, kag sang ulihi, nagsulod ini sa show business.
Sang Marso, liwat nga ginpabilib ni Rabiya ang netizens matapos nga nalab-ot sini ang 741 General Performance Score sa National Medical Admission Test (NMAT). Sulod siya sa top 99th percentile sang tanan nga medical school applicants sa bilog nga Pilipinas.
Sini lang nga bulan, ginpakigbahin sini nga magabalik siya bilang full-time student matapos nabaton ini sa University of Santo Tomas nga ginakilala nga isa sa pinakadumaan kag pinaka-prestihiyoso nga medical schools sa Pilipinas.#
Photo: @joshuaenriquez via Rabiya Mateo/Facebook
