Gindeklarar ang elementary girls sang Western Visayas nga overall champion sa patag sang athletics sa Palarong Pambansa 2026 matapos nga gindominar ang running events.
Sa interview sang Bombo Radyo kay Mr. Ray Cabarles, ang sports development officer sang Iloilo Sports Development and Management Office (ISDMO), iya ginpahayag nga kagab-i sang gin-anunsyo sang technical officials ang amo nga resulta sa tournament.
Nanguna sa pagdala sang banner sang Western Visayas sa amo nga division ang “Flash Girls” sang Quinto Distrito sa Iloilo nga ginabug-usan nanday Trixia Anne Arellano halin sa Concepcion, kag Maria Athena de Guiño, Norlyn Bedo, kag Princesa Lyn Yanson halin sa banwa sang Carles.
Sila ang nagkampyon sa 4x400m relay.
Nangibabaw man sila sa 4x100m relay kun sa diin nakalab-ot pa sa 51.79 seconds nga amo ang nag-guba sang 52.44 seconds nga record sa Palarong Pambansa nga napagkit sadtong 2015.
Yara sa likod sang ila kadalag-an amo ang ila trainer kag coaches amo sanday Rey John delos Reyes, Leone Tiosayco kag Benedicto Prasas.
Magluwas diri, si Arellano ang nagdaog man sang gold medals sa 100-meter dash kag 200-meter dash.
Tumandok si Arellano sang Barangay Lo-ong, Concepcion, produkto sang Concepcion Central School, ginabansagan nga “Super Tikya”, kag bantog nga nagadalagan nga nagatiniil lang.
Suno kay Cabarles, nakit-an sini kun daw ano ka-espesyal ang abilidad sang mga kabataan sa Quinto Distrito nga nagapangibabaw indi lamang sa Western Visayas kundi mangin sa highest meet sa Pilipinas nga amo ang Palarong Pambansa.
“Indi ko pa matungkad kun ngaa kadamo sang mga talento nga ara dira sa ila. I think basi kun geographic location ukon pwede man nga linahi. Ka-special sang mga kabataan nga ini,” suno kay Cabarles.
Ginpahayag man ni Cabarles nga sa secondary boys division, isa kuntani sa ginalauman nga makabulig sa paghakot sang medalya para sa Western Visayas amo si Kian Labar halin sa Dingle, Iloilo.
Nagadalagan siya sa 100-, 200-, kag 400-meter dash apang wala naka-compete sa Palarong Pambansa sa Agusan del Sur bangud sa hamstring injury nga naangkon sini antes ang tournament.
As of this writing, nagapangatlo ang Western Visayas sa overall medal tally nga may 28 gold, 25 silver, kag 24 bronze medals — sunod sa perennial powerhouse nga National Capital Region kag CALABARZON.#
Photo: Mr. Ray Cabarles/Facebook
