Ginarekomenda ni anay Department of Health Secretary kag subong Iloilo 1st District Rep Janette Garin ang pagdesignar sang COVID-19 lab Czar.
Sa ginpatigayon nga teleconference meeting sang House Defeat COVID-19 Committee , ginpahayag ni Garin nga magaserbe nga operations manager ang COVID-19 Lab Czar sa mga laboratoryo nga magapatigayon sang test sa nasambit nga balatian.
Ginatan-aw man ni Garin nga sa nasambit nga paagi, ma-maximize ang kapasidad sang mga laboratoryo kag gilayon nga masabat ang mga kinahanglanon sang mga pumuluyo.
Dugang sang natungdan, ang COVID-19 Lab Czar man ang magatalana sang numero sang test nga kinahanglan patigayunon sang mga laboratoryo kag magpangita sang paagi sa tion nga kinahanglan sang dugang nga manpower ukon lab augmentation.
Katungdanan man sang COVID-19 Lab Czar ang makig-angot sa Department of Finance, Department of Trade and Industry kag Department of Interior and Local Government para sa pagresponde sang gobyerno batok sa COVID-19.
Siya man ang magadumala sa timely release sang COVID-19 test results agud gilayon nga makahulag ang mga local government units kag ospital sa pagcontain sang infections.
Ini man ang magahatag sang report sa publiko may kaangtanan sa inventory sang mga available nga test kits.
