ILOILO CITY – Wala pa sang natapos nga plano ang Iloilo City Government may kaangtanan sa mga lihok nga patigayunon sa syudad sang Iloilo batok sa pagpamahog sang Coronavirus Disease 2019.
Sa interview sang Bombo Radyo kay Iloilo City Mayor Jerry Treñas, iya ginpahayag nga sa iya pakipaghinun-anon sa mga gobernador ila na istoryahan kun ano ang pinaka maayo nga option nga mahimo patigayunon sa bilog nga isla sang Panay agud malikawan nga magsulod ang nasambit nga balatian.
Gin-athag sang alkalde, nga wala pa nila na diskusyunan ang posibilidad sang pagpatuman sang lockdown sa syudad sang Iloilo kag iban pa nga probinsya sa isla sang Panay.
Suno kay Treñas, ginaplastar pa nila subong ang tanan nila nga plano sa kaayuhan sang tanan nga pumuluyo sa syudad.
Padayon man nila nga gina monitor ang mga Persons under monitoring sa syudad agud gilayon nga makapatigayon sang contract tracing sa tion nga may magpositibo sa COVID-19.
Nagpasalig naman ang natungdan nga bastante ang basic commodities sang syudad kag padayon ang pagsulod sang mga produkto nga nagikan sa Metro Manila sa pihak sang ginpatuman nga community quarantine.
