ILOILO CITY – Welcome development para sa Police Regional Office 6 ang pagsungka ni Police Corporal Joseph Andrew Joven sa National Bureau of Investigation matapos naulamid sa twin shooting incident.
Sa interview sang Bombo Radyo kay Police Lt. Col. Gilbert Gorero, acting Public Information Officer sang Police Regional Office 6, iya ginpahayag nga isa ka maayo nga balita ang pagsungka ni Joven agud nga masolbar na ang kaso.
Suno kay Gorero, wala niya makita ang presensya ni Joven apang nagasalig siya sa National Bureau of Investigation nga amo ang nagapanguna sa imbestigasyon.
Ginpahayag ni Gorero nga magapadayon ang collaboration sang Police Regional Office 6 kag sang National Bureau of Investigation agud nga mapadasig ang pagkilala sang duha pa ka John Doe nga naulamid sa krimen.
Si Police Corporal Jerry Villanueva naman suno kay Gorero ang yara sa kustodiya sang Police Regional Office 6 tubtub nga wala sang warrant of arrest.
Sa pagpaathag ni Gorero, regular filing ang pagpasaka sang kaso kag bangud sini, madugayan pa ang pagpaguwa sang warrant of arrest batok sa duha ka pulis.
Si Villanueva suno kay Gorero ang napaidalom sa restricted custody sa Kampo Delgado kun sa diin may yara sang nagabantay sa iya nga police escort.
May kaangtanan diri, ginpromisa sang natungdan nga magapadayon ang internal cleansing sa hanay sang Philippine National Police.
