Ginmandu na ni President Ferdinand Marcos Jr. ang pagtukod sang Water Resources Management Office (WRMO) sa idalom sang Department of Environment and Natural Resources (DENR).
Sa ginpirmahan nga Executive Order No. 22, ginmanduan sang presidente ang amo nga opisina nga tingbon ang tanan nga programa sang gobyerno nga may tuyo nga mapasiguro ang available kag sustanaible nga tubig sa pungsod.
Mandato man sang amo nga opisina nga ipatuman gilayon ang Integrated Water Resources Management nga kaangot sa United Nations Sustainable Development Goals, kag ginmanduan man ini nga maghimo sang Water Resources Master Plan.
Ginpahayag sang Presidential Communications Office nga ginhimo ang amo nga order agud nga masabat ang mga pagpanghangkat nga naga-apekto sa management sang water resources sa pungsod lakip na ang nagasaka nga demand bangud sa nagasaka man nga populasyon; impact sang climate change kag sang pandemic; kag kakulang sang nagakaigu nga imprastraktura nga nagaresulta sa indi patas nga pag-distribute sang tubig sa mga pumuluyo.
Una na nga ginpahayag sang presidente nga naga-eksperyensya ang pungsod sang krisis sa tubig.
