ILOILO CITY – Mangin dako nga bulig sa ekonomiya sang Iloilo City ang hagna nga nagduso nga tungaon sa duha ka congressional districts ang syudad.
Sa exclusive interview sang Bombo Radyo kay Iloilo City Lone District Rep. Julienne ‘Jamjam’ Baronda, iya ginpahayag nga tuman ang iya kalipay bangud naaprubahan na sa third and final reading ang nasambit nga hagna.
Suno kay Baronda, positibo siya nga maaprubahan man sang Senado ang nasambit nga hagna agud dalayon na nga matunga sa duha ka distrito ang Iloilo City.
Sa tion nga matunga sa duha ka distrito ang Iloilo City, ang 1st district ang bug-usan sang Jaro, La Paz kag Mandurriao.
Samtang ang 2nd district ang bug-usan naman sang Lapuz, Molo, Arevalo, kag City Proper.
Nagakahulugan nga duha na ang mangin Representative sang Iloilo City sa Kamara.
May yara man sang reapportioning sa Sangguniang Panlungsod kun sa diin mangin 16 na ang Councilors; buot silingon, may walo ka konsehal sa kada distrito, samtang isa gihapon ang Mayor sa syudad.
Mangin dako man ini nga bulig sa Syudad suno kay Baronda ilabi na subong nga pandemya agud mas mabatak ang ekononiya sang Iloilo City.
Ang co-authors ni Baronda sa House Bill 8477 amo sanday 5th District Cong. Raul Tupas, Iloilo 2nd District Cong. Michael Gorriceta kag Abang Lingkod party-list Cong. Joseph Stephen Paduano.
Sang, gin-usisa naman kun sin-o ang posible magpadalagan bilang lloilo City 1st kag 2nd district Representative, ginpahayag ni Baronda nga madamo man sang mga lagting nga politiko nga kwalipikado sa posisyon.
