TIGBAUAN, ILOILO – May yara na sang person of interest ang pamilya tuhoy sa ginapahayag paghikog sang 16 anyos nga dalagita sa Brgy. Supa, Tigbauan, Iloilo.
Ini ang kasunod sang revisit nga ginpatigayon sang otoridad sa crime scene kun sa diin mas nagbaskog ang panindugan sang pamilya nga wala naghikog ang biktima.
Sa exclusive interview sang Bombo Radyo kay Andres Gambalan, amay sang biktima, iya ginpahayag nga indi man lang magliwan sa ila ang posible suspek.
Suno kay Gambalan, ang nasambit nga persona ang ginapahayag may yara sang interes sa biktima.
Ginpahayag ni Gambalan nga posible isa man sa rason kun nga-a naghikog ang dalagita amo ang pag-akig sang ila himata bangud sa isyu sang kuryente apang indi ini bastante nga rason sa pagbitay sang biktima.
Sa pihak sini, ginpahayag sang natungdan nga mas mabaskog sa gihapon ang motibo nga hungod nga ginpatay ang biktima kag ginpaguwa lang nga suicide bangud sa mga ebidensya nga nakita sa crime scene.
Kun sundon ang nasambit nga anggulo, mahimo nga ginsulod sa balay ang dalagita, gintuyo nga himuslan, nagbato, ginlampusan sang matig-a nga bagay kag ginpaguwa lang sang suspek nga naghikog ang biktima.
Lakip man sa mga rason nga ginplastar sang amay amo ang istilo sang paghigot sang lubid sa balayan, ang mga dugo nga kasubong nga ginpalhit sa dingding sang kwarto, nakita nga bagat sa sulod sang kwarto nga posible gingamit sa pagduhol sang lubid sa balayan kag kun hikog, kun tani wala nagadapat sa salog ang tiil sang biktima nga kasubong nga nagaluhod.
Magluwas diri, wala man nagagumon ang kagamitan sa sulod sang kwarto ilabi na ang bangko nga posible kun tani tungtungan sang biktima sa pagbitay.
