TIGBAUAN, ILOILO – Depresyon ang ginalantaw nga rason sa paghikog sang 36 anyos nga nurse sa Brgy. Napnapan Norte, Tigbauan, Iloilo.
Sa interview sang Bombo Radyo kay Dorothy Tantiado, utod sang biktima, iya ginpahayag nga tinuig na nga nagabatyag sang depresyon ang iya utod.
Suno kay Tantiado, magkaiping man lang ang ila balay apang bangud sa kasakuon, wala na niya natalupangdan kun ano na ang ginapanghimo sang biktima.
Ginpahayag ni Tantiado nga udto na sang iya ginsugo ang hinablos nga magpadulong sa kaiping nga balay kag didto na nasapwan ang nagabitay nga bangkay sa kusina nga bahin.
Kaupod sang biktima nga naga-istar sa balay amo ang isa pa nila ka utod nga may deperensya sa paminsaron kag ang senior citizen nga amay.
Daku naman ang pagpati sang otoridad nga wala sang foul play sa insidente.
Sa pagpaathag ni Police Major Rolando Araño, hepe sang Tigbauan Municipal Police Station, nagaguwa sa imbestigasyon kag sa pahayag sang pamilya nga suicide ang natabo.
Santo sa pagpangusisa sa crime scene, wala sang forcible entry apang sa pihak sini, mas maayo suno kay Araño nga ipaidalom sa autopsy ang bangkay.
