TUBUNGAN, ILOILO – Hustisya ang ginasinggitan sang pamilya kasunod sang pagluthang-patay kay Police Master Sergeant Arnel Paurillo sa Brgy. Teniente Benito, Tubungan, Iloilo.
Sa interview sang Bombo Radyo kay kapid sang biktima, iya ginpahayag nga wala siya sang ihibalo kun ano gid ang motibo sa pagpatay sa iya utod.
Suno sa utod nga nagpahinago lang sang pangalan, mabuot nga tawo ang biktima rason nga magluwas sa trabaho, wala na sang iban pa nga motibo sa krimen.
Ginpahayag sang utod nga wala nagapanugid sa ila ang biktima kun tuhoy sa trabaho ang pagahambalan rason nga nagalaum na lang sila sa ikasarang sang Police Regional Office 6 sa pagsolbar sa kaso.
Kun tani suno sa natungdan, makonsensya ang ginabanta apat ka suspek nga nagpatay sa biktima nga naka-angkon sang 17 ka mga pilas.
Samtang, indi pa matumod sang otoridad ang matuod nga motibo sa krimen kag posible nga nasundan sang mga suspek ang biktima nga nagpadulong sa balay sang iya abyan sang natabo ang insidente.
Sa pagpaathag ni Police Lieutenant Jose Rommel Samson, hepe sang Tubungan Municipal Police Station, wala pa sang daku nga development sa kaso kag posible nga may kaangtanan sa trabaho ang pagpatay kay Paurillo.
Suno kay Samson, kumpirmado nga rebelde nga New People’s Army ang nagpatay sa biktima kun sa diin lakip sa mga nakuha gikan sa pulis amo ang duha ka service firearm.
Ang isa sa duha ka motorsiklo nga ginsakyan sang apat ka mga suspek ang natigayon nga mabalik apang wala lang sang ihibalo ang hepe kun paano ini natigayon.
Gin-ako naman sang Napoleon Tumagtang Command sang New People’s Army nga sila ang responsable sa krimen.
Suno kay Gibriela Tubungbanua, nagpakilala nga Public Information Officer sang rebelde nga grupo, indi matuod nga may yara sang police operation nga patigayunon sa Brgy. Teniente Benito rason nga yara ang presensya ni Paurillo.
Gin-akusaran man ni Tubungbanua si Paurillo nga nagaserbe nga protektor sang illegal drugs baliskad sa iya trabaho bilang intel officer sang Provincial Drug Enforcement Unit.
Gin-athag man sang natungdan nga wala sila sang personal nga dumot kundi nakasala sa rebolusyonaryo ang nasambit nga pulis.
