ILOILO CITY – Wala nagapati ang pamilya nga nagbato sa otoridad ang drug personality nga naluthangan-patay sa ginpatigayon nga buy-bust operation sa Brgy. Tabuc Suba, La Paz, Iloilo City.
Sang Hulyo 17, ginbawi-an sang kabuhi ang drug personality nga si Melvin Gabunas, 46 anyos sang nasambit nga lugar matapos nagbato sa mga katapo sang Regional Drug Enforcement Unit kun sa diin nakuha ang P8,000 nga buy-bust money, 17 ka sachet sang suspected shabu kag .38 caliber pistol.
Sa interview sang Bombo Radyo kay Joan Gabunas, utod sang biktima, iya ginpahayag nga nagakatulog na sila sang nabati-an ang isa ka lupok nga ginsundan pa gid sang warning shot sang nagpakilala nga pulis.
Suno kay Gabunas, ang lupok ang naghalin sa direksyon kun sa diin nahamtang ang kwarto nga ginatulugan sang iya utod.
Ginpahayag ni Gabunas nga wala na siya nakaguwa sa balay bangud sa kakulba kag iya na lang nabati-an nga ginapatawgan na sang Scene of the Crime Operations agud nga usisaon ang lugar kun sa diin natabo ang insidente.
Sang 2016 suno sa natungdan, napreso ang iya utod bangud sa illegal drugs kag sang 2018 lang nakaguwa sa presuhan kag nagtrabaho sa manukan kag sa talyer.
