TIGBAUAN, ILOILO – Wala nagapati ang pamilya nga naghikog paagi sa pagbitay ang 16 anyos nga dalagita sa Brgy. Supa, Tigbauan, Iloilo.
Sa exclusive interview sang Bombo Radyo kay Andres Gambalan, amay sang biktima, iya ginpahayag nga madamo sang sirkumstansya nga nagapamatuod nga kasubong nga hungod nga ginpatay ang iya anak.
Pila lamang sa mga rason suno kay Gambalan amo ang mga masunod: ang tinulo sang dugo sa sulod sang kwarto sa balay sang lola sang biktima, ang dugo sa magtimbang nga pusug-pusugan apang isa lamang ka tiil sang biktima ang may pilas, tuman ka nubo sang balayan kun sa diin nagbitay ang biktima kag ang suicide note nga nakita sa crime scene nga kasubong nga gin set-up lamang.
Suno kay Gambalan, ang tinulo sang dugo sa bangkay lakip na sa dingding kag sa salog sang kwarto ang mahimo naghalin sa kinatawo sang biktima kun sa diin nagaguwa sa autopsy examination nga may yara sang attempted penetration.
Magluwas diri, natukiban man sa autopsy examination nga may yara sang hanog sa mga kamot, tiil kag iban pa nga bahin sang lawas ang biktima.
Ginpahayag ni Gambalan nga wala sang ihibalo ang iya anak sa patag sang knot-tying ukon paghigot sang pisi apang makatilingalahan nga kasubong nga figure-eight knot ukon timber hitch knot ang paghigot sang lubid sa balayan.
Tuman kanubo sang balayan kun sa diin nagadapat na sa salog ang tiil sang biktima kag ang penmanship naman sa suicide note ang lain kun ipaanggid sa panulat sang iya anak.
Ginakwestyon sang amay kun nga-a wala sang Scene of Crime Operation nga nagpangusisa sa crime scene kag kun tani, padalman sang otoridad ang kaso agud mahibalu-an kun ano gid ang matuod nga natabo.
Antes pa man ang insidente, ginpahayag ni Gambalan nga gin-akigan pa ang biktima sang iya mga tiya bangud sa linya sang kuryente apang indi ini bastante nga rason sang paghikog sang dalagita.
Ginatahod sang otoridad ang pahayag sang pamilya sang 16 anyos nga dalagita.
Sa interview sang Bombo Radyo kay Police Major Rolando Araño, hepe sang Tigbauan Municipal Police Station, iya ginpahayag nga sa subong, indi pa matul-id kun bala naghikog ang biktima apang wala man ginadula ang posibilidad nga posible matuod ang pangduha-duha sang pamilya nga ginpatay ang dalagita.
Suno kay Araño, ginabasehan lang sa imbestigasyon amo ang natipon nga ebidensya kag ang resulta sang autopsy examination kun sa diin nakumpirma nga may yara sang attempted penetration sa kinatawo sang biktima apang wala naman sang signs of struggle.
Ginpahayag ni Araño nga posible nga nagbitay ang biktima paagi sa pagtungtung sa bangko agud nga mahigot ang pisi sa balayan kag posible nga naglumpat sa bintana nga may grills nga kawayan kun sa diin ang pilas nga nakita sa tiil ang posible nakasagaid sa nagalabaw nga kabilya.
Kun tuhoy naman sa penmanship suno kay Araño, kasubong nga nagasanto ang panulat nga nakita sa suicide note sa panulat sang biktima kag wala man sang palatandaan nga ginpwersa ang biktima sa sulod sang kwarto.
Natukiban man sa autopsy examination nga wala sang foul play nga natabo kag wala man ginlampusan ang biktima kun sa diin ang iban sa mga lagob nga nakita ang posible tuga sang nag-clot nga dugo.
Ginpanindugan man sang natungdan nga well-trained ang mga pulis sa Tigbauan Municipal Police Station rason nga wala na gintawgan ang Scene of Crime Operation agud magpangusisa sa crime scene.
Sa pihak sini, ginpahayag sang hepe nga indi pa case-closed ang natabo sa biktima nga isa ka 3rd year high school student.
