ILOILO CITY- Ginpanginwala ni Guimaras Governor Samuel Gumarin nga pulitika ang rason kun ngaa wala ginbaton sang Guimaras Provincial Government ang iya ginpatuman nga resident ID System sa Buenavista, Guimaras.
Sa interview sang Bombo Radyo kay Gumarin, may yara sang ginkasugtan ang executive committee sa probinsya sang Guimaras nga inbound kag outband pass gani amo ang ini dapat ipatuman.
Suno kay Gumarin, wala man nag-agi sa executive committee ang resident ID System nga ginpatuman ni Reyes kag mahimo nga wala man ini nag-agi sa consultation.
Apang gin-athag sang gobernador nga bukas ini sa nasambit nga konsepto apang kinahanglan ngamag-agi ini sa legal nga proseso kag hilisugtan sang executive committee sang probinsya.
Samtang, ginpanindugan naman ni Buenavista Mayor Eugene Reyes nga may fiscal autonomy ang Local Government Unit kag mahimo ini magpatuman sang mga sistema sa kondisyon nga wala ini sang may ginalapas nga layi.
Gindugang pa sang alkalde nga ila man napresentar ang nasambit nga resident ID System sa executive committee apang wala man sang feedback nga nabaton si Reyes tuhoy diri.
Ginpamilit pa sang natungdan nga kinahanglan i-adoptaron ini nga sahi sang sistema bangud nga para man ini sa kaayuhan sang tanan ilabi na sa madasig nga contact tracing sa tion nga may yara sang magpositibo sa COVID-19 sa ila lugar.
Dugang pa sang alkalde, parehos man nga duag puti ang resident ID System kag sa outbound/inbound pass nga gina isyu sang Guimaras Provincial Government apang mas manipis lang ang ginhatag sa mga residente sang Buenavista, Guimaras.
