PASSI CITY – Magadihon ang Passi City Government sang isa ka position letter agud mapahibalo sa Department of the Interior and Local Government (DILG) ang problema sang syudad may kaangtanan sa byahe sang mga tricycle sa national highways.
Ini ang kasunod sang Memorandum Circular 2020-036 nga ginpapanaug sang DILG.
Ang amo nga memorandum ang nagadumili sa mga tricycle sa pagbyahe sa national highway; kag subong man, nagamandu sa pagtukod sang tricycle task force nga separado sa tricycle regulatory board agud nga makadihon kag maka-review sang tricycle route plan.
Sa interview sang Bombo Radyo kay Passi City Mayor Atty. Stephen Palmares, iya ginpahayag nga madamo sang mga tricycle sa syudad sang Passi ang wala na sang iban pa nga ruta nga mahimo maagyan magluwas lang sa national highway.
Partikular nga gintumod sang alkalde ang Brgy. Man-it, Punong, Sablogon, Bacuranan, Bayan, Agtambo, Aglalana, kag Sarapan.
Suno kay Palmares, mahimo nga madamo man sang iban pa nga kabanwahan ang may kaangay nga problema.
Gin-athag man sang natungdan nga bilang abogado kag alkalde, katungdanan niya nga sundon ang mandu sang DILG apang suno sa iya, ang tinutuyo sang position letter amo nga mapakigbahin lang ang kalabanan nga reklamo sang madamo nga pumuluyo nga mahimo maka-apekto sa ila pangabuhian.
