PASSI CITY – Ipaidalom sa enhanced community quarantine (ECQ) ang Passi City, umpisa subong nga adlaw, Enero 28 tubtub Pebrero 11.
Sa exclusive interview sang Bombo Radyo kay Passi City Mayor Atty. Stephen Palmares, iya ginpahayag nga ang nasambit nga tikang ang may katuyuan nga indi na magdamo kag maglapta ang Coronavirus disease 2019 (COVID-19) sa nasambit nga syudad.
Suno kay Palmares, matapos marekord ang dululungan nga pagpositibo sa COVID-19 sang 84 ka mga vendors sa Passi City Public Market, nakasugtan sang Passi City Government nga hugtan ang quarantine status sang syudad.
Matandaan nga nagdangat sa masobra 600 ka mga vendors sa Passi City Public Market ang nagpaidalom sa Reverse Transcription Polymerase Chain Reaction (RT-PCR) test.
Ini matapos una nga nagpositibo sa COVID-19 ang pito ka nga vendors sa nasambit nga merkado.
Suno kay Palmares, isa ka empleyado sang Passi City Hall nga tag-iya sang kiosko sa merkado ang una nga nagpositibo sa COVID-19.
Matapos ang ginpatigayon nga contact tracing, natukiban nga nalatnan man sang COVID-19 sa anom pa gid ka mga vendors.
Sa anom ka mga nalatnan sang COVID-19, duha ang sa bugasan, isa sa ugahan, tatlo sa nagapangkay-o relo.
Sa subong, naka-lockdown ang Passi City Public Market.
Gin-athag naman sang alkalde nga mahimo makagwa kag makasulod sa Passi City ang mga residente sang syudad nga frontliners.
Ang mga nagasakay naman sang bus nga may ruta Iloilo-Roxas City and vice versa ang mahimo makalabay, apang indi makalagaw ukon makapanaog sa Passi City.
