Liwat nga nagsabwag sang iya gahum ang three-time Best Import nga si Justin Brownlee sa imbukada nga semifinal match sang Barangay Ginebra batok sa San Miguel Beermen sa Philippine Basketball Association (PBA) Governor’s Cup.
Lima sa anum ka kuwatro-puntos ang nahimo ni Brownlee kag nagtapos nga may 33 puntos, eight rebounds kag five assists sa 122-105 nga kadalag-an sang Ginebra batok sa Beermen sa Game 1 sa PhilSports Arena subong nga gab-i, Oktubre 9.
Sa 33 puntos sang resident import, 20 ang natira sini sa ikatatlo nga quarter — lakip ang tatlo halin sa four-point line — nga nagpasangkad pa sang abanse halin sa five-point halftime lead sang Gin Kings.
Halin sa 63-58 nga halftime score, naka-34 puntos ang Kings batok sa 20 sang Beermen sa amo nga quarter.
Dalayawon man ang performance ni Stephen Holt nga may 30 puntos kag apat ka assists.
Sa San Miguel, may 27 points, 8 rebounds, 4 assists, kag 2 steals ang import nga si EJ Anosike samtang ang reigning MVP naman nga si June Mar Fajardo ang may 16 points, 16 rebounds, kag 7 assists.
Balantayan ang Game 2 sa best-of-seven series sa Biyernes, 7:30 sa gab-i, sa Smart Araneta Coliseum.
Scores:
Barangay Ginebra 122 – Brownlee 33, Holt 30, Abarrientos 13, Thompson 10, Ahanmisi 9, J. Aguilar 9, Pinto 9, Devance 8, Adamos 1, Cu 0.
San Miguel 105 – Anosike 27, Lassiter 18, Fajardo 16, Perez 13, Ross 7, Rosales 6, Romeo 6, Enciso 6, Cruz 4, Tautuaa 2, Nava 0, Brondial 0
Quarters: 27-28, 63-58, 97-78, 122-105.
