Nagtambong sa plenary session sang House of Representatives si Leyte 1st District Representative Martin Romualdez sa pihak sang padayon nga kontrobersiya nga may kaangtanan sa gin-alegar anomaliya nga flood control project.
Makita si Romualdez nga aktibo nga nagapartisipar sa sesyon sang Kamara, kag ginpangamusta pa ini sang pila niya ka kapareho nga nga mga mamalidha sa sulod sang plenary hall.
Apisar sa ginapangatubang nga isyu, isa sa mga layi nga iya ginaduso amo ang House Bill 8466 ukon ang National Land Use Act, nga naaprubahan na sa ikatlo kag katapusan nga pagbasa sang Mababang Kapulungan sang Kongreso.
Ang katuyuan sang layi amo ang pagtukod sang isa ka komprehensibo nga plano sa paggamit sang duta sa pungsod agud mapabakod ang food security, mapauswag ang kahandaan sa kalamidad, kag masolbar ang mga problema sa pabalay kag imprastraktura.
Suno kay Romualdez, ang amo nga layi isa ka reporma agud isahon ang nagkalain-lain nga polisa sa paggamit sang duta sa nagkalain-lain nga sektor.
