Igasumiter na sang Senate Blue Ribbon Committee sa Office of the Ombudsman kag Department of Justice ang tanan nga ebidensya nga ila nakuha nga may kaangtanan sa ila imbestigasyon sa maanomaliya nga flood control projects sa pungsod, ini kasunod sang ila ginpresentar nga report sa plenaryo sang Senado.
Suno kay Committee Chairman Panfilo Ping Lacson, ginahanda na ang isa ka transmittal letter agud pormal nga mahatag sa natungdan nga mga ahensya ang kabug-osan nga mga ebidensya, lakip ang mga dokumento, testimonya, kag pati ang mga transcript of stenographic notes.
Gin-athag sang senador nga ginpasapubliko sini nga kabahin sang report paagi sa isa ka privilege speech agud magamit sang mga otoridad ang mga dokumento nga wala nagalapas sa mga patakaran sang Senado.
Ang ginpagwa nga partial committee report nagalakip sang isa ka reform kag referral package nga nagatuyo pabakuron ang gahum sang Ombudsman kag DOJ.
Ginbuyagyag naman ni Lacson nga indi isa lamang ka “mastermind” ang nagadumala sa madamo nga anomalya sa pondo sang flood control projects, kundi ang mga opisyal mismo sang nagkalain-lain nga sangay sang Department of Public Works and Highways.
Base sa pagbusisi sang senador, ang korapsyon ginadumalahan sang mga organisado nga grupo nga nakabase sa kada regional kag district office sang ahensya, kag sila mismo ang nagapatigayon sang iregularidad sa ila tagsa ka nasakupan.
Ginpahayag ni Lacson nga imposible nga may isa lamang ka tawo nga nagahatag sang mando sa tanan nga regional director pati na sa secretary sang DPWH agud kawaton ang pondo sang gobyerno.
