Nag-anunsyo ang pila ka mga buluthuan sa syudad kag probinsya sang Iloilo subong nga adlaw Marso 3 nga magasupende ang mga ini sang klase bangud man sang madali apang mabaskog nga linog nga nagluntad kagab-i.
Yari ang listahan sang mga nagdeklarar sang class suspension:
Sa syudad sang Iloilo, nag-kanselar sang klase ang Iloilo National High School, University of San Agustin (all levels) kag ISAT-U Main Campus (all levels).
Sa probinsya naman sang Iloilo nagdeklarar man ang mga banwa sang Oton, Tubungan all levels kag bilog nga adlaw, samtang sa Guimbal, Tigbauan kag ISAT-U Miagao Campus suspende ang klase sa aga lamang kag magabalik ini sa hapon depende sa ila mga Local Government Units.
Nahibaluan nga bangud sa linog nga nagtay-og kahapon sa Guimbal Iloilo, ginpakamaayo nalang sang iban nga buluthuan sa syudad kag Probinsya sang Iloilo nga ikanselar anay ang klase kag mag-shift sa Alternative Delivery Mode of Learning.
Sa bahin naman sang syudad sang Iloilo, nagpahayag si Iloilo City Mayor Raisa Treñas sa mga school administrators sa mga pampubliko kag pribado nga mga eskwelahan sa siudad nga magpatigayon sang inspection sa ila mga establisyamento.
Suno kay Treñas, magadepende man sa assessment sang mga school administrators kun ila isuspende ang mga face-to-face classes sa tagsa ka mga buluthuan sa siudad.
Nahibaluan nga may ara man sang nakit-an nga mga minor cracks sa pila ka mga establisyamento sa siudad sang Iloilo.
