ILOILO CITY- Ginakabig nga dungog para sa isa ka apo nga may lolo ini nga isa ka war veteran.
Sa interview sang Bombo Radyo kay Kim Francis Paloma, apo sang beterano nga si Private First Class Abello Eler sang Janiuay, Iloilo, iya ginpahayag nga lima ka tuig nga nangalagad bilang suldado ang iya lolo sang panahon sang giyera.
Suno kay Paloma, nalipay gid ini bangud masami man nga ginapakigbahin sang iya lolo ang mga inagihan sini sang panahon sang imperyalismo sang mga Hapones kag kun paano ini nagpakig-away para sa kahilwayan.
Pahayag ni Paloma, isa gid ka ehemplo sang matuod-tuod nga Pilipino ang iya lolo bangud sa ginpakita sini nga kaisog agud pangapinan ang pungsod.
Nahibaluan nga isa si Private First Class Abello Eler sa ginhatagan sang pagkilala kadungan sang seremonya nga ginpatigayon sa Balantang Cemetery National Shrine sa Barangay Quintin Salas sa Jaro, Iloilo City bilang pagkomemorar sa ika- 79 nga anibersaryo sang Liberation of Panay.
