Duha ka mga senador ang nagapati nga indi na kinahanglan pa ang extension para sa SIM (subscriber identification module) registration deadline.
Buwas na, Abril 26, ang deadline kag may yara pa sang telecommunications players nga nagahingyo nga i-extend ini sang national government.
Apang para kanday Senate Minority Leader Koko Pimentel kag Sen. Win Gatchalian, wala na sang rason nga palawigon pa ang SIM registration deadline. Suno kay Pimentel, ang tuyo sang layi amo nga makit-an kun ano nga mga SIM cards ang ginagamit para sa “serious, legal, kag important purposes”.
Kun 44% lang suno sa iya ang nagakabagay nga mangin active, amo na ini ang numero kag indi na kinahanglan nga i-extend.
Para naman kay Gatchalian, nagapati siya nga indi gid man malab-ot ang 100% sang masobra 168 million ka subscribers.
Sa bahin sang National Telecommunications Commission (NTC), ginpahayag ni Deputy Commissioner Jon Paulo Salvahan nga wala pa sang final decision sa posible nga extension.
Kahapon, may meeting ang NTC kaupod sa Department of Information and Communications Technology (DICT), telco operators, kag iban pa nga stakeholders agud mahambalan ang status sang SIM registration.
Suno naman kay DICT Secretary Ivan Uy, may “final meeting” sa telcos subong nga Martes kag subong man nga adlaw i-anunsyo kun may yara gid man sang i-grant nga extension.
