Arestado ang 36-anyos nga Pinay sa North Las Vegas, Nevada, USA matapos ginluthang ang isa ka pastor sa atubang mismo sang iya asawa kag duha ka kabataan.
Ang biktima nga napatay gid amo si Nick Davi, 46-anyos nga pastor sa Grace Point Church sa Las Vegas.
Gindala man sa ospital ang iya asawa nga si Sara bangud nakaangkon man sang mga samad kasunod sang insidente.
Suno sa North Las Vegas Police, nag-away ang biktima kag ang suspek nga si Joe Junio kag sang ulihi naglab-ot na sa pagtiro sang babayi sa pastor, apang indi pa subong matul-id kun ano gid ang motibo sa krimen.
Suno naman kay Ty Neal, isa pa ka pastor halin sa Grace Point Church, madugay na nga ginagamo sang suspek ang pamilya sang pastor nga iya man lang kasilingan.
Sa pagkamatuod, naka-apply na ang pamilya sang biktima sang temporary protection order batok kay Junio kag natalana na sa Enero 8 ang court hearing sa amo nga order.
Naka-detain subong ang Pinay sa Clark County Detention Center kag natalana nga pasakaan sang kaso nga murder, attempted murder, discharge of firearms, kag two counts of child abuse.
