Natukiban nga nagabusong sang iya subang nga bata ang 32-anyos nga Pinay caregiver nga si Mary Anne Velasquez de Vera nga napatay matapos ang missile attack sang Iran sa Israel.
Suno ini sa iya previous employers nga sanday Barbara Wachspress kag Janice Prawer nga amo ang una sini nga gin-obrahan sang nag-abot siya sa Tel Aviv.
Espesyal para sa duha si Mary Anne nga gintawag nila nga “angel on Earth.”
Nag-abot si Mary Anne sa Israel sang 2019 kag ang una sini nga nangin alaga amo ang iloy nanday Wachspress kag Pawer nga si Doris Gurin nga isa ka former nurse.
Suno kanday Wachspress kag Prawer, nag-alang-alang pa anay ang ila iloy nga magkuha sang live-in carer kag ang kaupod lamang sini amo ang iya ido nga Shih Tzu nga si Wally.
Sang ulihi, sang nagdesisyon na ini nga kinahanglan gid man sini sang caregiver, naglantaw sila sa potensyal nga makuha nila, kag palareho man sila nga nagpili kay De Vera bangud nagpanugid ini nga isa siya ka “puppy-lover.”
“Our mom was the first person that Mary Anne cared for in Israel,” suno kay Wachspress. “She had the most wonderful smile. We brought her to our mom’s apartment, and they both started hugging, and it was love at first sight.”
“She doted on our mom like a loving granddaughter and called her Mother Earth,” suno naman kay Prawer. “She also loved Wally. When he got sick, she would wake up in the middle of the night to make sure he took his pills.”
Dugang ni Prawer, “She was part of our family, a ray of sunshine — so special, caring, and devoted.”
Na-ospital anay si Gurin kag na-infect sang coronavirus.
“The agency recommended that Mary Anne leave, but she insisted on staying to care for Mom,” suno kay Wachspress.
Sang ulihi, nagtaliwan gid si Gurin bangud sa COVID-related complications, apang nagpabilin nga suod si de Vera sa pamilya sini.
Suno sa mag-utod, nabatian nila ang balita nga napatay si Mary Anne paagi man sa isa ka Filipino national nga suod man sa ila.
“It took me a long time to believe this had actually happened,” suno kay Wachspress.
“I couldn’t absorb it,” pahayag naman ni Prawer. “We were up crying all night. It’s devastating.”
Pahayag nila, nalugpayan sila kun ila panumdumon ang ginhambal anay ni De Vera sa lubong ni Gurin sadtong 2021: “She said, ‘Until we meet again, and I’ll continue to take care of you in the afterlife.'”
Nahibaluan nga tumandok sang Basista, Pangasinan si De Vera.
Siya ang una nga Filipino casualty sa Israel sang nag-ibwal ang tension batok sa Iran sang weekend.
Nakumpirma ang iya identity paagi sa biometric records sa Abu Kabir Forensic Institute. Naga-trabaho man ang bana ni de Vera sa Israel, kag ini mismo ang positibo nga nag-identify sa bangkay sang iya asawa.
Ginapahayag nga ginabuligan sini ang iya alaga nga makasaylo sa bomb shelter, apang antes pa man sila makapanago, naigo na ini sang shrapnel sang nagtupa nga bomba sa ila apartment sa Tel Aviv.
Ang missile attacks sang Iran amo ang ila pagtimalos kasunod sang una nga pag-atake sang US kag Israel sadtong Sabado nga amo ang nagpatay sa Supreme Leader kag senior military officials sang Tehran.#
