ILOILO – Ginpauntat ang operasyon sang pito ka mga KTV bars nga nahamtang sa guwa sang puerto sa Dumangas, Iloilo.
Sa interview sang Bombo Radyo kay Dumangas Mayor Ronaldo “Onal” Golez, iya ginpahayag nga wala sang business permit ang ini nga mga establishemento bangud wala ginhatagan sang barangay clearance sa ila lugar.
Dugang pa ni Golez, may petisyon nga ginpirmahan ang mga pumuluyo sa lugar bangud nangin tuman na kasabad ang gahod, madamo sang aksidente nga nagakatabo, may mga napatay sa aksidente sa dalan, kag magamo sa tion sang kaagahon.
Iya ginpahayag nga antes pa man ipasirado ang pito ka mga KTV bars, nakigsapol siya sa mga tag-iya sang sini nga mga negosyo kag gin-athag ang rason pati na ang desisyon sang ila banwa.
Suno kay Golez, nakigkooperar man ang mga tag-iya kag wala man sang mga problema ang mga ini.
Dugang ni Golez, mahimo man sila nga makabukas sang bag-o nga negosyo sa amo nga lugar, kaangay sang karinderya, sa kondisyon nga wala lang sang paglapas sa layi sang banwa sang Dumangas.
