Pito ka mga tawo ang patay, isa ka isa-ka-tuig nga bata ang yara sa kritikal nga kondisyon, kag apat ka tawo ang missing bangud sa landslide nga natabo sa Monkayo, Davao de Oro kadungan sang mabaskog nga pagbubo sang ulan.
Natabuan nga nagapatigayon ang mga biktima sang prayer worship sa sulod sang balay sa Purok 19, Pagasa sa Barangay Mt. Diwata pasado 11:00 sang aga sang natabo ang trahedya.
Kasunod sang insidente, nagpatigayon ang municipal government sang Monkayo sang forced evacuation sa mga residente sa Barangay Mt. Diwata.
Pasado ‘las tres sa hapon, temporaryo nga gin-untat ang disaster response efforts bangud wala naga-untat ang ulan kag may pagtiphag man sang duta sa iban nga mga area sa amo nga barangay.
Magapadayon ang pagpangita sa missing nga mga indibidwal subong nga Byernes, Enero 19.
Ginsuspinde man sang banwa ang klase sang mga estudyante subong nga adlaw.
Nahibaluan nga ang shear line amo ang nagatuga sang mamunog nga pag-ulan sa lugar.#
