MANILA – Yara sa 40, 000 ka mga pulis ang handa nga i-deploy sang Philippine National Police (PNP) sa tion nga ipatuman na ang lockdown sa National Capital Region (NCR) bangud sa coronavirus disease 2019 (COVID-19).
Suno kay PNP Chief Police General Archie Francisco Gamboa, gamiton sang otoridad ang kapin 28,000 ka mga personnel nagikan sa NCR Police Office kag kapin 10,000 ka mga opisyal nagikan sa Camp Crame.
Wala pa sang napatuman nga lockdown sa subong, apang suno kay Gamboa, nakahanda ang kapulisan kun maglala ang sitwasyon.
Sa pihak nga bahin, nagpasalig man si Armed Forces of the Philippines (AFP) Chief General Felimon Santos nga magahatag man sang nagakaigu nga assistance ang AFP sa posible nga lockdown.
Nahibaluan nga nag-file na si Senator Francis Tolentino sang hagna sa senado nga naga-propose sa paghatag sa Department of Health (DOH) sang authority nga i-lock down ang infected nga mga lugar, isuspinde ang mga klase, kag iban pa nga lihok sa tion sang public health emergencies.
Nahibaluan man nga sa subong, naglab-ot na sa 49 ang kumpirmado nga kaso sang coronavirus disease 2019 sa Pilipinas.
