Gin-athag sang Philippine National Police nga wala sila sang may nabaton nga opisyal nga dokumento kaangot sa gina-alegar nga pag-isyu sang International Criminal Court (ICC) sang arrest warrants sa bisan sin-o nga opisyal sa pungsod.
Kasunod ini sa alegasyon ni 1st District Davao City Rep. Pulong Duterte nga may ara sang ginpaguwa nga warrant of arrest ang ICC batok kanday Sen. Bong Go kag duwa ka anay pulis nga naangot sa drug war ni anay President Rodrigo Duterte.
Ginkumpirma man ni Interior Sec. Jonvic Remulla nga wala man ini sang nabaton nga pormal nga dokumento nahanungod sa ginapahayag nga warrant batok kay Go.
Gin-athag man sang tag-pamaba sang Department of Justice nga si Atty. Polo Martinez wala pa sang opisyal nga kumpirmasyon halin kay Justice Sec. Fredderick Vida.
Nahibaluan nga si Go, upod kay Sen. Bato Dela Rosa ang isa sa duha sa nagapungko nga senador nga gindala sang ICC prosecutor bilang parte sang “co-perpetrators” sa kaso nga crimes against humanity batok kay anay President Rodrigo Duterte.
Apang sa karon padayon sa gihapon nga wala nagapakita sa publiko si Dela Rosa matapos ang pagpalagyo sini sa awtoridad sang Mayo 14.
