ILOILO – Gintutukan sang Philippine National Police ang pagpatigayon sang mga lihpok agud nga matapna ang tanan nga sahi sang Cyber crime.
Sa Good Morning Philippines program, ginpahayag ni Patrolman Emerito Frutas Jr. sang Regional Anti-Cyber crime Unit 6, nga padayon ang ila nga pagpatigayon sang seminar sa mga eskwelahan agud nga mapahangop sa mga estudyante kag manunudlo ang tuhoy sa Cyber crime kag kun paano ini malikawan.
Suno kay Frutas, ang Cybercrime amo ang mga krimen nga nahimo sa bulig sang teknolohiya kag internet kasubong sang pagpalapta sang fake news, nude photos, sex videos kag scam.
Ginpahayag ni Frutas nga ang mga masami nga biktima sa paglapas sang Anti-Voyeurism Act amo ang mga pamatan-on samtang ang mga masami nga biktima sang scam amo ang mga professional ukon ang may yara sang trabaho.
Importante suno kay Frutas amo nga antes magbakal online, hibaluon anay ang credential sang seller kag hibaluon kun bala makabig nga legitimate information ang naka-post sa social media.
Sa subong suno sa natungdan, epektibo ang kampanya sang Regional Anti-Cyber crime Unit 6 bangud nga nagnubo ang numero sang mga biktima sang Cyber crime.
