Ginpasalig sang Philippine National Police (PNP) nga indi na basta-basta nga mag-assign sang sin-o man nga tinawo sa mga drug operations unit.
Suno kay PNP spokesperson Police Col. Jean Fajardo, ginmandu ni PNP Chief General Benjamin Acorda Jr. ang mas hugot nga vetting process ukon ang pagsala sa mga personnel nga makasulod sa drug operations halin sa national headquarters panaog sa stations unit.
Ginpahayag pa ni Fajardo nga ginmandu ni Acorda nga mas id-idon pa ang background investigation nga himuon mismo sang commander ukon mismo sang pinuno sang opisina kag kinahanglan man ini nga magpirma bilang pamatuod nga nasala sang maayo ang police personnel.
Pananglitan makit-an nga may problema ang personnel, may salabton ang commander nga nagpirma nga siya ang naghimo sang background investigation.
“The background investigation will further be intensified and field commanders were the ones tasked to conduct it and all their findings were tasked to be written so that if there would be problems later on, we would hold them accountable,” suno kay Fajardo.
Katuyuan man sini nga tikang suno sa natungdan nga ang mga pulis nga may yara na sang derogatory record ang indi na makabalik sa drug enforcement group ukon sa anuman nga anti-illegal drugs unit.
Mabug-at ang salabton sang field commanders kun may makalusot nga PNP personnel nga involved sa iligal nga droga. Posible ini nga mahulog sa serious neglect of duty, isa ka penalty nga mahimo magpahalin sa iya sa serbisyo.
Matandaan nga kahapon, ginpahayag ni Interior Secretary and National Police Commission Chairman Benhur Abalos nga may kaso-administratibo nga ipasaka batok sa apat ka high-ranking officials sang pulis bangud sang gin-alegar nga kahilabtanan sa iligal nga droga.
Ang wala pa ginhingadlan nga duha ka heneral kag duha ka colonels ang lunsay nagikan anay sa Drug Enforcement Group nga amo ang anti-illegal drug unit sang national police.
Magluwas sa kaso-administratibo, may kaso-kriminal man nga ipasaka ang Deputy Ombudsman for Military and Other Law Enforcement Offices.
Una naman nga gin-rekomendar sang five-man advisory panel nga i-reject ang courtesy resignations sang 917 police officers bangud malimpyo ang ila pangalan kag cleared sa imbestigasyon, samtang may 32 ka iban pa nga opisyal nga ipaidalom pa sa dugang nga imbestigasyon. #
