ILOILO CITY – Madamo sang mga anggulo nga ginasundan ang mga Philippine National Police (PNP) sa pagpatay sa assistant manager sang isa ka fast food chain sa sulod sang iya balay sa Gonzaga Street Brgy. Purok 4 Pavia Iloilo.
Sa interview sang Bombo Radyo kay Police Major Fernand Limbungan, hepe sang Pavia Municipal Police Station, iya ginpahayag nga wala sang forcible entry sa balay kag wala man sang ginkawat sa mga gamit sang biktima nga si Eira Jane Fabiańa, 22 anyos, assistant restaurant manager sang Jollibee sa GT Mall Pavia Iloilo.
Suno kay Limbungan, nagpatigayon na sila sang case conference agud madasig nga masolbar ang kaso.
Sa subong suno kay Limbungan may yara na sila sang mga persons of interest.
Ini ang ginalakipan sang nakaaway sang biktima nga isa ka parking attendant sa gina-ubrahan sini nga Mall, ang abyan sini nga babaye nga nagdul-ong sa iya kagabi, ang magulang sini nga lalaki nga bag-o lang halin sa Barotac Nuevo Iloilo antes matabo ang krimen kag ang trisikad driver nga naga-inom sa tyangge nga nahamtang sa naidalom nga bahin sang kwarto sang biktima.
Usisaon man sang mga otoridad kung paano nabuksan sang magulang sang biktima ang iya cellphone apisar may password ini.
Posible suno sa hepe nga kilala sang biktima ang suspek bangud wala ginpwersa ang ila pirtahan.
Magluwas sini, wala man lang sang footsteps ukon tapak sang tiil sa balay sini apisar nga nag-ulan kagabi.
