Ginalantaw sang Department of Energy (DOE) nga mag-ayo-ayo man ang power situation sa Panay sa katapusan sang bulan.
Suno sa ahensya, maga-improve ang serbisyo sang Panay grid kun makumpleto na ang Cebu-Negros-Panay transmission upgrade kag kun matapos na ang maintenance shutdown sang major power plant nga gina-operate sang Palm Conception Power Corp. (PCPC).
Pahayag pa sang ahensya, kinahanglan nga magpadayon sa pag-coordinate ang power generators, distribution utilities kag system operator para nga ma-maintain ang stability sang grid kag madasig nga maka-recover sa epekto sang power outages.
Una na nga ginpahayag sang National Grid Corp. of the Philippines (NGCP) nga ang shutdown sang power units sang Panay Energy Development Corp. kag ang maintenance shutdown sang Palm Conception Power Corp. amo ang rason sang panibag-o nga power interruption sa Panay kag Negros Occidental sang Byernes sang gab-i.
Nahibaluan nga ang power supply sa Panay ang ginakuha sa apat ka large coal-powered plants nga may total capacity nga 451 megawatts kag siyam ka mas gamay nga diesel/bunker plants nga may total capacity nga 220.3 megawatts.
Suno pa sa ahensya, ang total power demand naman sa isla ang mas manubo sa 400 megawatts.#
