ILOILO CITY – Nagbalik na sa normal ang operasyon sang mga empleyado sang Iloilo City Hall matapos ang madinalag-on nga troubleshooting sa power interruption kahapon nga adlaw, Nobyembre 28.
Sa interview sang Bombo Radyo kay Iloilo City Hall Building Adminisrator Mitch Antiqueña, iya ginpahayag nga 1:30 sa hapon gin-umpisahan ang pagkaayo kag natapos takna ‘las syete sa gab-i.
Nadugayan suno kay Antiqueña ang troubleshooting bangud may magagmay nga mga line wires.
Suno kay Antiqueña, gindesisyunan nga papaulion ang mga empleyado nga naga-obra kahapon agud mangin tayuyon na ang iya pag-obra sa pagpabalik sang power supply.
Gin-athag man ni Antiqueña nga functional ang generator set sang city hall kag indi man matuod ang mga alegasyon nga naubusan ini sang crude oil.
Ginlahog pa sang opisyal nga kon matuod nga naubusan ini sang gatong, sya mismo ang personal nga magabakal.
Nagalaum man si Antiqueña nga indi na masulit ang nasambitan nga power interruption bangud daku ang epekto sini sa mga operasyon sa city hall.
Ginpasalig man sang natungdan nga ginahatagan sang ‘priority preventive maintenance’ ang mga equipment sang building, lakip na ang generator set kag air conditioner.
Nahibaluan nga nagluntad ang power interruption kahapon bangud sa short-circuit nga nagluntad sa air-conditioner nga nahamtang sa ikaapat nga panalgan.
