Ginpangunahan ni President Ferdinand ‘Bongbong’ Marcos, Jr. ang send-off ceremony para sa Filipino athletes nga magapasakop sa 32nd Southeast Asian Games sa Phnom Penh, Cambodia sa Mayo 5-17.
Ginpatigayon ang seremonya sa Philippine International Convention Center sa Pasay City.
Yara sa 860 ka atleta, 76 reserved kag 347 sports officials, medical personnel kag support staff ang maga-byahe sa Cambodia para sa amo nga hinampang.
Magapakigbahin ang Team Philippines sa 608 ka mga events sa 38 ka sports.
Nahibaluan nga sa idalom sang Republic Act 10699 ukon sa National Athletes and Coaches Benefits and Incentives Act, nakasaad nga makabaton sang P300,000 nga insentibo ang atleta nga makabulsa sang bulawan nga medalya; P150, 000 para sa silver; kag P60,000 sa bronze medalist.
Matandaan nga sa 2021 Seagames sa Hanoi, Vietnam, nakadala-pauli ang Pilipinas sang 227 ka medalya kun sa diin 52 ang gold, 70 ang silver, kag 105 ang bronze.
Pang-apat ang Pilipinas sa pwesto sa amo nga edisyon sang SEA Games.
