CABATUAN, ILOILO – Wasak ang bumper sang puti nga Ford Everest matapos nagsuhot sa idalom sang naka-parking nga truck nga may karga nga sin sa Brgy. Gines Patag, Cabatuan, Iloilo.
Ang driver sang pribado nga salakyan amo si Jesus Muela sang Badiangan, Iloilo, isa ka senior citizen kag tag-iya sang funeral parlor.
Sa interview sang Bombo Radyo kay Gilbert Doroteo, isa sa mga nakakita sa aksidente, iya ginpahayag nga naabriya sa takladon nga bahin sang Brgy. Gines Patag ang nasambit nga truck.
Suno kay Doroteo, hinali lang nga nagsuhot sa likod sang truck ang salakyan nga ginamaneho ni Muela.
Ginpahayag ni Doroteo nga naga-isahanon lamang si Muela sang natabo ang aksidente.
Yara naman sa maayo nga kahimtangan ang biktima matapos naka-angkon sang pilas sa liog.
