ILOILO – Nakahanda na ang Police Regional Office 6 sa patigayunon nga monitoring may kaangtanan sa nagahilapit nga holiday season.
Sa interview sang Bombo Radyo kay Police Lt. Colonel Joem Malong, tagpamaba sang Police Regional Office 6, iya ginpahayag nga ginahulat na lang ang approval sang security coverage para sa christmas season agud mahibaluan ang ila mangin assignment.
Suno kay Malong, isa sa mga ginabantayan kag ginatutukan nila amo ang street crimes nga masami nagakatabo sa holiday season bangud nga madamu ang nagapadulong sa syudad sang Iloilo agud mamalaklon.
Ginpahayag man sang natungdan nga tubtob lang sa ika duha nga semana sang Disyembre ang regular leave sang mga pulis samtang nagakadapat naman mag report ang mga naka day off nga personnel sa Christmas kag New Years’s Eve.
