ILOILO CITY- Mas ginpahugot pa sang Police Regional Office VI ang paghatag sang seguridad sa mga local officials sa rehiyon nga may yara sang pagpamahog sa kabuhi.
Ini kasunod sang natabo nga pag-assasinate kay Negros Oriental Governor Roel Degamo kag pagkaulamid sa walo ka iban pa nga sibilyan sang ginsulod sang armado nga mga kalalakihan nga ginapatihan mga anay katapo sang militar ang compound sang balay sang opisyal sa Brgy. San Isidro, Pamplona, Negros Oriental.
Natabo ang asasinasyon pila ka adlaw lang matapos nga ginmandu ni General Rodolfo Azurin, Jr., chief sang Philippine National Police, sa tanan nga police commanders nga mag-conduct sang threat assessment sa tanan nga elected kag appointed officials sa ila tagsa ka area of responsibility bangud man sa serye sang pagpang-ambush sa mga local officials.
Sa interview sang Bombo Radyo kay PBGen Leo Francisco, direktor sang Police Regional Office VI, iya ginpahayag nga sa subong paagi sini, mas mahibaluan nila kun ano ang ila nga himuon agud maproteksyunan ang kabuhi sang mga opisyal.
Dugang pa niya, ini ang regular naman nga ginahimo sang kapulisan, kun sa diin, kabahin ini sang ila nga report sa seguridad sa area of jurisdiction.
Nagpamalibad naman ini nga tumuron kun sin-o nga mga local officials ang may pagpamahog sa kabuhi.
