Aprubado na ni Guimaras Governor Samuel Gumarin ang Executive Order nga magapaidalom sa probinsya sang Guimaras sa Enhanced Community Quarantine bangud sa kahangawa sa COVID-19.
Sa interview sang Bombo Radyo kay Guimaras Vice Gov John Eduard Gando, iya ginpahayag nga magalawig ang pagpatuman sang Enhanced Community Quarantine tubtob Abril 15.
Suno kay Gando, pasaraduhan naman ang mga establisyemento komersyal magluwas lang sa nagabaligya sang essential goods kaangay sang pagkaon kag bulong.
Dugang sang natungdan, pahanugutan lang nga makasulod sa probinsya ang mga residente sang Guimaras kun matsekyar nga wala sila sang simtomas sang nasambit nga balatian.
Kun indi naman residente sang Guimaras, pahanugutan lang nga makasulod kun magdul-ong sang pagkaon ukon may yara sang emerhensya.
Santo man sa pahayag ni Gando, dumilian man nga makagwa ang mga Guimarasnon padulong sa Iloilo ukon sa iban pa nga lugar magluwas lang kun may emerhensya.
Sa tion nga maggwa sila kag magbalik sa Guimaras, kabigon na sila nga Persons Under Monitoring kag ipaidalom sa 14 ka adlaw nga quarantine.
Sa mga pangayaw naman nga yara na sa probinsya antes pa man ipatuman ang Enhanced Community Quarantine, nagakadapat sila nga magkuha sang permiso gikan sa talatapan sang gobernador agud makagwa sila sa isla kag makapauli sa ila tagsa ka mga panimalay.
Sa subong may yara na sang 23 ka mga Persons Under Monitoring kag isa naman ka Persons Under Investigation ang probinsya sang Guimaras.
Nagapabilin man nga COVID free ang nasambit nga probinsya bangud wala pa sang kaso sang nasambit nga balatian sa ila nga lugar.
