Problema sa manibela suno sa US National Transportation Safety Board ang nangin rason sang pagbungguanay sang isa ka tanker kag isa ka cruise ship sa Mississippi River sa New Orleans, USA sang nagligad nga semana.

Nadiskubrehan nga naipit sa isa ka posisyon ang Atlantic Asphalt, gani nagliko ini pakadto sa sidlangan nga pangpang sang suba.

May sakay nga 190 ka tawo ang cruise ship nga American Heritage sang natabo ang insidente kag nagtakilid ini sa pantalan.

Ginkumpirma man sang awtoridad nga wala sang may napatay sa insidente, apang pila ka pasahero ang ginpangluwas sang mga awtoridad.

Suno sa NTSB, wala pa matumod ang rason sang pagkaguba sang steering system sang tanker.

Narecover na man ang voyage-data recorder sang barko agud makabulig sa padayon nga imbestigasyon.

Ginapaidalom man sa imbestigasyon sang mga awtoridad ang mga angkla sang tanker kag nakatalana naman nga paga-interviewhon ang mga tripulante sini sa masunod nga semana.