GUIMARAS – Ginpaidalom sang Guimaras Provincial Police Office (GPPO) sa training ang mga kapulisan sa probinsya agud mabuligan hanas ang ila abilidad sa paglangoy.
Sa interview sang Bombo Radyo kay PLt Col Antonio Dizon, deputy provincial director for administration, iya ginpahayag nga umpisa kahapon nga adlaw, ginpatigayon ang ila swimming training nga ginatawag “Pulis Langoy Para sa Kaligtasan.”
Suno kay Dizon, ginahimo ang ini nga training agud matudluan sang basic skills ang mga pulis kag agud makabulig sila sa iban sa tion nga may mga trahedya nga matabo sa dagat.
Ginpahayag ni Dizon nga kinahanglanon ini sa mga insidente kaangay sang natabo nga Iloilo Strait sang Agosto 3, sa diin 31 ka tawo ang napatay.
Dugang ni Dizon, may ara sang 12 ka mga session sang nasambit nga training kag ginahatagan prayoridad ang mga pulis nga halanason pa ang abilidad sa paglangoy.
Ang ini nga inisyatibo ang ginpamunuan ni GPPO Director PCol Hector Maestral.
