OTON, ILOILO – Preso ang isa ka pulis matapos nagpaniro sang iya abyan sa Barangay Sta. Rita, Oton, Iloilo.
Ang suspek amo si Patrolman Mike Tagacay, legal ang edad, kasado, residente sang nasambit nga barangay kag assigned sa Oton Municipal Police Station.
Ang biktima naman amo si Maria Librias Billones, 50, residente man sang nasambit nga lugar.
Sa interview sang Bombo Radyo kay Police Captain Lunelyn Talamillo, deputy chief of police sang Oton Municipal Police Station, iya ginpahayag nga nag-inom-inom ang pulis kaupod ang biktima.
Bangud sa tuman nga kahulugbon, nagbais ang mga ini tubtob gintiro sang pulis ang biktima sa tiyan kag dughan.
Gindala naman sa ospital ang biktima agud hatagan sang nagakaigo nga pagbulong.
Nagsungka naman ang pulis sa Oton Municipal Police Station dala ang iya 9mm nga pusil nga amo ang gingamit sa krimen.
