ILOILO – Indi na madayon ang promotion kun tani sang isa ka pulis sa Negros Occidental matapos nga magpositibo sa ilegal nga droga kag posible man sya nga ma dismiss sa serbisyo apang indi bangud sa ilegal nga droga.
Ang pulis amo ang ginkilala nga si Police Corporal Joey Silao nga na assign sa Negros Occidental Provincial Office kag kag na assign man sadto sa Dumangas Municipal Police Station.
Sa interview sang Bombo Radyo kay Pol. Lt. Col. Joem Malong, tagapamaba sang Police Regional Office 6 iya ginpahayag nga indi ang kaso ni Silao sa ilegal nga droga ang mangin rason sa pagka dismiss niya sa serbisyo kundi amo ang iya pag Absent without Leave ukon AWOL.
Suno kay Malong mahimo pa nga mabag-o ni Silao ang resulta sang iya nga drug test paagi sa pag kuha liwat sang nasambit nga eksaminasyon sa National Headquarters mismo sang Philippine National Police.
Dugang sang natungdan, bangud na dismiss si Silao paagi sa Absent without Leave mahimo nga ma disolve kag ibutang nalang sa archive ang iya nga kaso sa ilegal nga droga apang kun magbalik siya sa serbisyo posible nga buhion sa liwat ang nasambit nga kaso batok sa iya.
