ILOILO CITY- Magaserbe na si Queen Camilla bilang most high-profile public face sang British monarchy samtang nagarecover pa ang iya bana nga si King Charles III kag ang iya umagad nga si Catherine, Princess of Wales, gikan sa surgery.
Nahibaluan nga ang 75-anyos nga si King Charles ang na-admit sang tatlo ka gab-i sa ospital samtang naga- recovere sa operasyon bangud sa enlarged prostate apang ginpagwa na sang Lunes.
Ang 42-anyos naman nga si Catherine ang nagpaidalom sa abdominal surgery apang nakagwa na kag upod na niya subong ang bana nga si Prince William, kag ang ila tatlo ka kabataan.
Bangud sa pagpahuway nanday Charles kag Kate agud maka-recover kag samtang kinahanglan sang manunubli sang trono nga si William nga atenderon ang iya asawa,ang dako nga responsibilidad nga mag-atubang sa publiko ang ara subong kay Camilla.
Nagakahulugan man ini sang mas dako nga papel sa malip-ot lang nga tinion para sa nagaisahanon nga utod nga babaye sang hari nga si Princess Anne, 73, kag manghod sa duha ka mga utod nga lalaki nga si Prince Edward.
Ginalauman nga maglawig sang tubtob isa ka bulan ang pagpaayo ni King Charles samtang si Kate naman ang mahimo nga madula sa mata sang publiko tubtob sa Marso 31.
