Patigayunon na subong nga adlaw, Hulyo 25, ang labing-una nga State of the Nation Address (SONA) ni President Ferdinand ‘Bongbong’ Marcos Jr.
Igadul-ong ini sang bug-os nga pwersa sang Bombo Radyo Philippines kag mabatian kag malantaw sa tanan nga digital platforms sang network.
Ini ang una nga SONA sa Batasang Pambansa Complex nga patigayunon sa full face-to-face set-up halin sang natabo ang Covid-19 pandemic.
Yari ang iban pa nga quick facts sa SONA 2022:
1,365 ang imbitado lakip na ang tanan nga buhi nga former presidents sang Pilipinas.
Indi makatambong si former president kag subong Pampanga Second District Representative Gloria Macapagal Arroyo bangud nagpositibo siya sa COVID-19.
Si Director Paul Soriano ang maga-direct sang SONA broadcast.
Bag-o lang gid natapos sang House of Representatives leadership ang P100-million renovation sa Batasang Pambansa kag timing gid para sa SONA kag sa pagbukas sang 19th Congress. Gin-renovate ang plenary hall kag may yara sang bag-o nga video kag sound system.
Ang Ilocos Norte-based choir nga Samiweng Singers amo ang maga-amba sang national anthem. Ini nga choir sang Ilocos Norte National High School ang nakakuha sang awards sa first Vietnam International Choir Competition and Festival sa 2011 kag sa 7th World Choir Games sa Cincinnati, Ohio, USA sang 2012.
Ginalauman nga i-deliver ni Marcos ang iya speech 4 p.m. sa joint session sang House kag Senate sa plenary hall sang Batasang Pambansa. May yara sang 315 House members (congressmen) kag 24 senators.
“Simple cocktails” ang iga-serbe sa guests pagkatapos sang speech.
May mobile phone signal jamming nga himuon pila ka oras antes ang speech sang presidente. Kabahin ini sang security measures.
Gin-deklarar nga no fly zone ang Batasang Pambansa Complex sa Quezon City bilang kabahin man sang security measures.
Tanan nga tawo nga magasulod sa Batasang Pambansa Complex ang kinahanglan nga mag-presentar sang negative antigen test result, samtang ang magasulod naman sa plenary hall ang kinahanglan magpakita sang negative reverse transcription-polymerase chain reaction (RT-PCR) test result.
May ultraviolet germicidal irradiation system nga gin-install sa plenary hall bilang dugang nga protection sa full face-to-face SONA.
Una na nga ginpahayag ni Presidente Marcos nga luyag sini ang “simple and traditional SONA”.
Pahanugutan ang vloggers kag mainstream media nga mag-cover sa event. ##
